سلیکٹرز کی قومی سکواڈ کیلئے کپتان سے مشاورت، اعلان رواں ہفتے متوقع

لاہور(سپورٹس رپورٹر)نیوزی لینڈ کیخلاف سیریز اور ٹی20 ورلڈکپ کے ممکنہ کھلاڑیوں پر سلیکٹرز نے کپتان بابراعظم سے مشاورت شروع کردی۔ کاکول اکیڈمی کے ٹرینرز کی حتمی فٹنس رپورٹ ملنے کے بعد نیوزی لینڈ کیخلاف سیریز کیلئے ٹیم کا اعلان رواں ہفتے متوقع ہے۔ ورلڈکپ کیلئے 20 سے 21 رکنی پول آف پلیئرز کی فہرست کو فائنل کرنے کے بعد حتمی منظوری کیلئے پی سی بی چیئرمین کے حوالے کیا جائیگا۔نیوزی لینڈ کیخلاف سیریز کے بعد قومی ٹیم کو آئرلینڈ اور انگلینڈ میں ٹی20 میچز کھیلنے جانا ہے۔پاکستانی کرکٹ بورڈ کو ورلڈکپ کیلئے ممکنہ کھلاڑیوں کی فہرست یکم مئی تک آئی سی سی کو جمع کروانی ہے، قواعد کے تحت 25 مئی تک سکواڈ میں تبدیلی ممکن ہوگی۔ذرائع کے مطابق پول آف پلیئرز میں پی ایس ایل میں عمدہ پرفارمنس پر اوپنر عثمان خان کو رکھا جارہا ہے۔ ریٹائرمنٹ واپس لینے والے فاسٹ بائولر محمد عامر اور آل راونڈر عماد وسیم کا نام بھی مجوزہ لسٹ میں شامل ہے۔فاسٹ بائولر حارث رؤف کو نیوزی لینڈ کیخلاف سیریز کیلئے زیر غور نہیں لایا گیا تاہم وہ آئرلینڈ، انگلینڈ اور ورلڈکپ کے سکواڈ کا حصہ ہوں گے۔ فخر زمان کی فٹنس رپورٹ کا بھی جائزہ لیا جارہا ہے۔وکٹ کیپنگ میں محمد رضوان کیساتھ اعظم خان ممکنہ پول آف پلیئرز کا حصہ بنے ہیں۔نوجوان سپنر ابرار احمد اور اسامہ میر بھی شاداب خان کیساتھ سپن بائولنگ کی قوت میں اضافہ کریں گے۔سلیکٹرز نے باہمی مشاورت سے جو فہرست ترتیب دی ہے اس میں کپتان بابراعظم، عثمان خان، صائم ایوب، فخر زمان، صاحبزادہ فرحان، سلمان علی آغا، افتخار احمد، اعظم خان، محمد رضوان، عماد وسیم، اسامہ میر، شاداب خان، شاہین شاہ آفریدی، نسیم شاہ، وسیم جونیئر، عامر جمال، حارث رؤف، محمد عامر‘ فخر زمان، عباس آفریدی اور زمان خان شامل ہیں۔