بلاول بھٹوزرداری نے عالمی دنیا میں اپنی صلاحیتوں کو اجاگر کیا:سیداحمد محمود

لاہور(نامہ نگار)پاکستان پیپلز پارٹی جنوبی پنجاب کے صدر و سابق گورنر پنجاب مخدوم سید احمد محمود نے کہا ہے کہ جس شاندار انداز میں بلاول بھٹو ذرداری عالمی رہنماو¿ں کے ساتھ مل کر پاکستان کے مسائل اور مسئلہ کشمیر کو بیرونی دنیا میں اجاگر کر کے اس کے حل کیلئے کوشاں ہیں وہ ناقابل مثال ہے۔ بلاول بھٹو زرداری نے بھٹو خاندان کی میراث کو فروغ دیتے ہوئے عالمی دنیا میں اپنی صلاحیتوں کو اجاگر کیا ہے۔ان خیالات کا اظہار انہوں نے گزشتہ روز مخدوم ہاو¿س لاہور میں جنوبی پنجاب سے آئے مختلف وفود سے ملاقات کے دوران کیا۔اس موقع پر پارٹی جنوبی پنجاب کے چیف کوآرڈینیٹر عبدالقادرشاہین بھی موجود تھے۔پاکستان کے نوجوان آئندہ انتخابات میں بلاول بھٹو ذرداری کو شاندار کامیابی دلا کر وزیر اعظم بنائیں گے اور پاکستان پیپلز پارٹی قومی اداروں کے ساتھ ملکر ملکی ترقی، پائیدار استحکام اور سا لمیت کیلئے کام کرے گی۔ پاکستان پیپلز پارٹی عوامی خدمت اور غربت کے خاتمہ پر یقین رکھتی ہے۔ سی پیک جیسا منصوبہ آصف علی ذرداری کی دوراندیشانہ پالیسیوں کا مظہر ہے۔ پاکستان سٹیل، ایٹمی پروگرام، میزائیل ٹیکنالوجی کے بعد سی پیک جیسے منصوبوں کی تکمیل سے پاکستان میں تعلیم، صحت، روزگار کے بنیادی مسائل کے حل میں پیش رفت ہوگی۔