ایس آئی ایف سی کی سہولت کاری کے باعث گاڑیوں کی برآمد شروع

 ایس آئی ایف سی کی سہولت کاری کے باعث گاڑیوں کی برآمد شروع ہو گئی ہے،پاک سوزوکی نے ایس آئی ایف سی کی سہولت کاری کے باعث بنگلہ دیش اور افغانستان کو گاڑیاں برآمد کرنا شروع کر دی ہیں ۔کمپنی کے سی ای اوہیروشی کاوامورا نے سوزوکی وینڈر کلسٹر ایریا کے افتتاح موقع پر اعلان کیا کہ کمپنی نے بنگلہ دیش اور افغانستان کو گاڑیاں برآمد کرنا شروع کر دی ہیں، سوزوکی وینڈر کلسٹر ایریاکا افتتاح وزیر صنعت و پیداوار رانا تنویر حسین نے کیا۔
 انجینئرنگ ڈویلپمنٹ بورڈ کے سی ای او خدا بخش اور سیکرٹری انڈسٹریز سیف انجم بھی تقریب کا حصہ تھے۔پاک سوزوکی کے سی ای اوہیروشی کاوامورا نے کہا کہ پاک سوزوکی 1997ء سے جاپان کو گاڑیاں اور آٹو پارٹس برآمد کر رہی ہے جن میں سافٹ ویئر اور موٹر سائیکل کے سپیئر پارٹس شامل ہیں اور یہ اقدام بین الاقوامی مارکیٹ میں پاکستانی ساختہ گاڑیوں کے معیار اور مسابقت کو ظاہر کرے گا ۔وزیر صنعت و پیداوار رانا تنویر حسین نے کہا کہ اس اقدام کا مقصد پاک سوزوکی کے مقامی سپلائرز کے نیٹ ورک کو وسعت دینا، مقامی سپلائی چین مینجمنٹ کے ذریعے کارکردگی کو بڑھانا اور اخراجات کو کم کرنا ہے، کمپنی نے پاکستان میں اپنی 2.5 ملین گاڑیوں کی پیداوار کا جشن بھی منایا اور اس سنگ میل کا سہرا انہوں نے ملازمین کی لگن، ایس آئی ایف سی کاوشو اور سازگار حکومتی پالیسیوں اور کسٹمر کے اعتماد سے منسوب کیا ۔تقریب میں موجود سرکاری حکام نے پاکستان کے آٹو موٹیو سیکٹر میں پاک سوزوکی کے تعاون کو سراہا، انجینئرنگ ڈویلپمنٹ بورڈ کے سی ای او خدا بخش نے گاڑیوں کے تقریباً 70 فیصد پرزہ جات کو مقامی بنانے میں کمپنی کی کامیابی پر روشنی ڈالی ۔
سیکرٹری انڈسٹریز سیف انجم نے پاک سوزوکی کی سالانہ 160,000 گاڑیوں کی پیداواری صلاحیت اور اس کی مصنوعات کو سراہا ، ایس آئی ایف سی نے پالیسی کی صف بندی اور برآمدی فروغ کے ذریعے آٹو موٹیو انڈسٹری کیساتھ تعاون کرنے کے اپنے عزم کا اعادہ کیا۔