شیرافضل مروت کی پارٹی رکنیت منسوخ پر بیرسٹرگوہر کا ردعمل

پی ٹی آئی رہنما شیرافضل مروت کی پارٹی رکنیت منسوخ کر دی گئی ،چیئرمین پی ٹی آئی بیرسٹرگوہر کا ردعمل سامنے آگیا ۔ نجی ٹی وی سے گفتگو کرتے ہوئے بیرسٹرگوہر نے کہا کہ شیر افضل مروت کی پارٹی رکنیت منسوخی کاعلم نہیں، بانی پی ٹی آئی سے ملاقات کروں گا اور بانی پی ٹی آئی کے سامنے ساری صورتحال رکھوں گا۔بیرسٹر گوہر علی نے کہا کہ مجھے نہیں معلوم اس وقت کون ہدایات جاری کر رہا ہے اور کون فیصلے لے رہا ہے، میرے علم میں یہ بات نہیں لائی گئی کہ بانی پی ٹی آئی نے اس قسم کی کوئی ہدایات جاری کی ہیں،اگر ایسا کچھ ہوتا تو مجھے ضرور پتا ہوتا، میں پارٹی کا چیئرمین ہوں۔انہوں نے کہا ہے کہ شیر افضل مروت کی رکنیت کیسے ختم کر دی گئی جب کسی کمیٹی نے ان کو بلایا تک نہیں، بانی پی ٹی آئی سے ملاقات کروں گا اور اس نوٹیفکیشن کو واپس کرائوں گا، شیر افضل مروت ہماری پارٹی کے رکن ہیں اوربانی پی ٹی آئی کے وفادار ہیں،شیر افضل مروت یا کسی بھی ممبر کو پارٹی سے نکالنے کا فیصلہ نہیں کروں گا ۔