اوپن یونیورسٹی نے پراسپیکٹس اور داخلہ فارم ویب سائٹ پر جاری کر دیے

اسلا م آباد(خصوصی نمائندہ)علامہ اقبال اوپن یونیورسٹی نے میٹرک سے پی ایچ ڈی تک تمام پروگرامز کے پراسپیکٹس اور داخلہ فارم آن لائن فراہم کردئیے ہیں ٗ کسی بھی پروگرام میں داخلوں کے خواہشمند افراد یونیورسٹی ویب سائٹ پر دستیاب داخلہ فارم آن لائن بھر کر کاپی پرنٹ کرکے اور مطلوبہ دستاویزات /اسناد کی تصدیق شدہ کاپیاں منسلک کرکے قریب ترین بینک میں داخلہ فیس سمیت جمع کرسکتے ہیں۔ بینک برانچز کی تفصیلات یونیورسٹی ویب سائٹ پر دستیاب ہیں۔علاوہ ازیں وائس چانسلر ٗ پروفیسر ڈاکٹرضیاء القیوم کی خصوصی ہدایت پر داخلوں کے خواہشمند افراد کو رہائش گاہوں کے قریب ترین مقامات پر مستفید کرنے کے لئے ملک بھر میں تحصیل سطح پر'پراسپیکٹس سیل پوائنٹس بھی قائم کردئیے گئے ہیں۔ ملک کے کسی بھی کونے میں رہائش پذیر داخلے کے خواہشمند افراد اپنے قریب ترین پوائنٹ سے داخلہ فارم حاصل کرسکتے ہیں۔