لاہور(سپورٹس رپورٹروقائع نگار)پاکستان سپر لیگ سیزن سیون کرکٹ میلہ لاہور میں سجنے کو تیار، سی سی پی او لاہور فیاض دیو کے مطابق لاہور پولیس تمام ملکی و غیر ملکی کھلاڑیوں،شائقین کرکٹ کوبھرپورسکیورٹی فراہم کریگی۔ پی ایس ایل میچز کی سکیورٹی کیلئے پہلے سے زیادہ بہتر لائحہ عمل تشکیل دیں گے۔ لاہور پولیس پاکستان میں بین الاقوامی کھیلوں کے فروغ کیلئے بھرپور کردار ادا کرتی آئی ہے،سکیورٹی انتظامات پر عملدرآمد کے لئے ضلعی انتظامیہ سمیت متعلقہ اداروں سے مکمل رابطہ میں ہیں،پولیس،ضلعی انتظامیہ اور دیگر ادارے سکیورٹی و دیگر انتظامات کیلئے مشترکہ ریہرسل بھی کریں گے۔ اس حوالے سے ٹیموں کی قیام گاہ،روٹس،سٹیڈیم کے گرد و نواح میں سرچ اینڈسویپ آپریشنز باقاعدگی سے جاری ہیں اورسی سی ٹی وی کیمروں کے ذریعے ٹیموں اور سٹیڈیم کے اطراف میں مسلسل مانیٹرنگ یقینی بنائی جائے گی۔میچز کے دوران ڈولفن سکواڈ،ایلیٹ اورپولیس ریسپانس یونٹ ٹیمیں مسلسل پٹرولنگ کریں گی اورٹیموں کے روٹ پر آنے والی بلند عمارتوں پر سنائپرز تعینات کئے جائیں گے۔ واضع رہے پی ایس ایل سیون 2022 کے فائنل سمیت 19 میچز 10 فروری سے 27 فروری تک لاہور میں کھیلے جائیں گے۔