ٹِم ڈیوڈ اپنی دھواں دار بیٹنگ کے بعد سوشل میڈیا پر چھاگئے

کراچی(یواین پی)پاکستان سپر لیگ (پی ایس ایل) کے آٹھویں میچ میں ملتان سلطانز کی جانب سے مخالف ٹیم کے باؤلرز پر چھکے اور چوکوں کی بارش کرنے والے ٹِم ڈیوڈ اپنی دھواں دار بیٹنگ کے بعد سوشل میڈیا پر چھاگئے۔مائیکرو بلاگنگ سائٹ ٹوئٹر پر ملتان سلطانز کے بلے باز ٹِم ڈیوڈ کے خوب چرچے ہورہے ہیں، ٹم ڈیوڈ نے صرف 29 گیندوں پر 6 چوکوں اور اتنے ہی چھکوں کی مدد سے 71 رنز کی دھواں دار اننگز کھیلی جبکہ رائلی روسو نے 35 گیندوں 67 رنز کی اننگز کھیلی۔ٹِم ڈیوڈ کی شاندار بیٹنگ دیکھنے کے بعد ٹوئٹر پر شائقین کرکٹ نے اُن کے لیے تعریفوں کے پُل باندھ دیے ہیں۔ایک صارف نے ڈیوڈ کے کھیل کی تعریف کرتے ہوئے کہا کہ ’ٹِم ڈیوڈ تباہی کا نام ہے۔‘افضل نامی صارف نے مزاحیہ میم شیئر کرتے ہوئے لکھا کہ ’ٹِم ڈیوڈ نے آج اسلام آباد یونائیٹڈ کے باؤلرز کو بہت دھویا۔‘زوہاد نامی صارف نے مزاحیہ انداز میں کہا کہ ’بھائی! ایک ٹِم ڈیوڈ کراچی والوں کو بھی دے دو۔واضح رہے کہ پاکستان سپر لیگ (پی ایس ایل) کے آٹھویں میچ میں ملتان سلطانز کے چھکوں کی بارش کے جواب میں اسلام آباد یونائیٹڈ کے کپتان شاداب خان نے بھی چھکے برسائے لیکن سلطانز کے بولرز نے اپنی ٹیم کو 20 رنز سے فتح دلوائی۔