پنجگور‘ نوشکی مین فورسز کے کیمپوں پر حملے کی کوشش، 4 دہشتگرد ہلاک، ایک جوان شہید

اسلام آباد (خبر نگار خصوصی) بلوچستان میں دہشت گردوں نے بدھ اور جمعرات کی درمیانی شب دو مختلف مقامات پنجگور اور نوشکی میں سکیورٹی فورسز کے کیمپوں پر حملے کی کوشش کی۔ پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز کی جوابی کارروائی میں دہشت گردوں کو بھاری جانی نقصان پہنچاتے ہوئے دونوں حملوں کو کامیابی سے پسپا کر دیا گیا۔ آئی ایس پی آر کے مطابق پنجگور میں دہشت گردوں نے دو مقامات سے سکیورٹی فورسز کے کیمپ میں داخل ہونے کی کوشش کی۔ تاہم فوجیوں کی بروقت جوابی کارروائی نے دہشت گردی کی کوشش کو ناکام بنا دیا۔ شدید فائرنگ کے تبادلے میں ایک فوجی شہید ہو گیا۔ جوابی کارروائی پر دہشت گرد فرار ہو گئے جبکہ ان کی ہلاکتوں کا تعین کیا جا رہا ہے۔ ادھر نوشکی میں دہشت گردوں نے ایف سی کیمپ میں گھسنے کی کوشش کی جس کا بھرپور جواب دیا گیا۔ جوابی کارروائی میں چار دہشت گرد مارے گئے۔ فائرنگ کے تبادلے کے دوران ایک آفیسر زخمی ہوا ہے جب کہ علاقے میں وقفے وقفے سے فائرنگ کا سلسلہ بھی جاری ہے۔