ریاض  (اے پی پی) سعودی  محکمہ تعلیم نے شدید بارشوں کی بنیاد پر مدینہ منورہ ، وادی الفرع اور الحناکیہ سکولوں میں عام تعطیل کا اعلان کیا اور عندیہ دیا ہے کہ تعلیمی عمل آن لائن جاری رہے گا۔ سعودی عرب میں مکہ، مدینہ، جدہ اور دیگر شہروں میں موسلا دھار بارش کے باعث سڑکیں زیر آب آگئیں اور 4انڈر پاس عارضی طور پر بند ہو گئے۔ موسمیات کے قومی مرکز نے خبردار کیا ہے کہ جدہ، رابغ اور الکامل میں شروع ہونے والی موسلادھار بارش کا سلسلہ آئندہ روز سہ پہر تک جاری رہے گا۔ مکہ مکرمہ، جدہ، الخرمہ، المویہ، تربہ، رنیہ، اضم، میسان، طائف، الکامل، رابغ، خلیص، عسفان، الجموم، بحرہ، اللیث اور الشعیبہ میں موسلادھار بارش  کے باعث سیلابی صورتحال کا خدشہ ہے۔ بارش کا  سلسلہ مدینہ منورہ، ریاض، حائل، القصیم، الجوف، لشرقیہ، حدود شمالیہ اور شمال مشرقی علاقوں تک پھیل جائے گا۔ بارش کے باعث بیشتر علاقوں میں ٹریفک کا نظام درہم ہرہم ہو گیا۔