کوٹلی (صبا ح نیوز)کوٹلی کے علاقہ گلہار میں زمین کے تنازعہ پر مخالفین کا خواتین پر وحشیانہ تشدد،متعدد افراد زخمی ہوکر ہسپتال منتقل ،پولیس نے پرچہ درج کرتے ہوئے 2ملزمان کو حراست میں لے لیا۔ بیگم، فرحت اشفاق،غلام بیگم،کنزہ کوثر اپنے گھر کے قریبی کھیت میں مکئی کی فصل کی گوڈی میںمصروف تھیں کہ ملزم پارٹی نے اُن پر ڈنڈوں اور سوٹوں سے حملہ کردیا۔ عورتوں کو مار پڑتے دیکھ کر گھر میںموجود مرد اور بچے بھاگ کر کھیت میں پہنچے تو حملہ آوروں نے انہیں بھی تشدد کا نشانہ بنا ڈالا۔ لڑائی مارکٹائی کے نتیجہ میں کنیز بیگم، فرحت اشفاق، غلام بیگم، کنزہ کوثر، طاہر، یاسر ، تسبیل اشفاق،کنزالرحمان، فرخ ساجد، معاذ فاروق زخمی ہوگئے۔ اطلاع ملتے ہی پولیس موقع پر پہنچ گئی، پولیس کے جوانوں نے زخمیوں کو تھانے پہنچایا جہاں سے مضروبی فارم لے کر زخمیوں کو ڈسٹرکٹ ہیڈکوارٹر ہسپتال کوٹلی منتقل کردیا گیا۔ دو ملزمان نوید اور عامر کو گرفتار کر لیا ہے۔ پولیس دیگر نامزد ملزمان کی گرفتاری کے لیے چھاپے مار رہی ہے ۔دوسری طرف زخمیوں کو ڈی ایچ کیو ہسپتال کوٹلی میں داخل کرکے طبی امداد دی جا رہی ہے جبکہ طاہر نامی زخمی کو راولپنڈی ریفر کر دیا گیا ہے۔ دریں اثنا ایک اور ڈکیتی ڈڈیال کے رہائشی کو روات کے مقام پرلوٹ لیا گیا۔ ڈاکوئوں6500 نقد پونڈ، زیورات اور قیمتی فون لوٹ لئے۔ حبیب نامی شخص کا کہناتھا کہ اس طرح کے واقعات ہوتے رہے تو کون اپنے وطن لوٹے گا۔