کراچی (اسپورٹس ڈیسک )برطانیہ میں جاری پشاور زلمی یوکے ٹیلنٹ ہنٹ کے دوسرے مرحلے میں ٹرائلز کے دوران گلاسگو میں  پشاور زلمی کے صدر اور کرکٹ لیجنڈ انضمام الحق نے نوجوان کرکٹرز کو لیکچر دیا۔ پاکستان کے سابق کپتان اور پشاور زلمی کے صدر انضمام الحق نے کہا کہ پشاور زلمی نے برطانیہ یورپ اور دنیا کے دیگر ممالک میں مقیم پاکستانی کمیونٹی ، گلوبل زلمی کلبز کے کرکٹرز اور مقامی کرکٹرز کو ٹیلنٹ ہنٹ کے زریعے صلاحیتوں کے اظہار کا بہترین موقع دیا ہے۔ گلاسگو میں نوجوان کرکٹرز کو اپنے لیکچر میں انضمام الحق نے کہا کہ نوجوان کرکٹرز کو اپنا فوکس ہمیشہ کارکردگی پر رکھنا چاہے،۔ دنیا کے کئی عظیم کرکٹرز کو کیرئیر کے ابتدا میں ناکامی یا مشکلات کا سامنا کرنا پڑا لیکن بلند حوصلوں اور کارکردگی پر توجہ سے وہ کرکٹرز عظیم بنے۔ انضمام الحق نے کہا کہ باصلاحیت کرکٹرز کو پشاور زلمی پاکستان سپر لیگ میں موقع دے گی۔ جن کو اس سال موقع نہ مل سکا ان کو آئندہ سال موقع دیا جائیگا لیکن نوجوان کرکٹرز کو ہمیشہ توجہ کرکٹ اور کارکردگی پر رکھنی چاہئے۔ پاکستان کے بعد پشاور زلمی کا ٹیلنٹ ہنٹ برطانیہ میں جاری ہے۔ سات شہروں اور مقامات پر یوکے ٹیلنٹ ہنٹ کے بعد یورپ میں بھی ٹرائلز کا انعقاد کیا جائیگا۔پشاور زلمی کے صدر انضمام الحق اور ڈائریکٹر کرکٹ محمد اکرم ٹرائلز کے لیے برطانیہ میں موجود ہیں۔