ڈائریکٹر جنرل ریسکیو1122 کے مختلف اضلاع کے دورے

پشاور (اے پی پی)ڈائریکٹر جنرل ریسکیو1122ڈاکٹر خطیر احمد نے عید الاضحی کے موقع پر موجود نوجوانوں کی حوصلہ افزائی کیلئے مختلف اضلاع کے دورے کئے۔ ڈائریکٹر جنرل نے ریسکیو1122اہلکاروں کو عید مبارکباد دیتے ہوئے دوران عید عوام کی جان و مال کی حفاظت کیلئے ہر دم تیار رہنے پر خراج تحسین پیش کیا اور ان میں مٹھائی تقسیم کی۔ عیدالاضحی کے دوران ریسکیو1122 کی چھٹیاں منسوخ کر دی گئیں تھیں۔انہوں نے کہا کہ عیدالاضحی کے 3دنوں میں مجموعی طور پر 1170 حادثات میں خدمات فراہم کیں جن میں 236 ٹریفک حادثات، 835میڈیکل ، 27آتشزدگی، 22 جرائم، 7 ڈوبنے اور 41 دیگر واقعات میں ریسکیو1122 نے پیشہ ورانہ خدمات فراہم کیں۔انہوں نے کہا کہ اس دوران بھی مختلف ایمرجنسیز میں مریضوں و زخمیوں کو ایک ہسپتال سے دوسرے ہسپتال منتقل کیا۔ عیدالاضحی کے موقع پر مختلف واقعات میں 1158 افراد کو طبی امداد فراہم کی گئی جبکہ ہسپتال منتقلی کے دوران 19 افراد جان کی بازی ہار گئے۔