ٹی 20 ورلڈ کپ 2026، پاکستان نے براہ راست کوالیفائی کر لیا

لاہور(سپورٹس رپورٹر ) انٹرنیشنل کرکٹ کونسل نے ٹی ٹونٹی ورلڈ کپ 2026 ء کیلئے کوالیفائیڈ ٹیموں کی تصدیق کردی۔ آئی سی سی کے مطابق ٹی ٹونٹی ورلڈ کپ 2026 ء کیلئے کوالیفائی کرنے والی ٹیموں میں پاکستان بھی شامل ہے۔ پاکستان نے ٹی ٹونٹی فارمیٹ میں بہتر رینکنگ کی بنیاد پر ورلڈ کپ 2026 ء کیلئے براہ راست کوالیفائی کیا۔ پاکستان رواں برس ہونے والے ٹی ٹونٹی ورلڈ کپ کے سپر ایٹ مرحلے میں نہیں پہنچ سکا تھا ۔ آئی سی سی کی طرف سے بتایا گیا ہے کہ ٹی ٹونٹی ورلڈ کپ 2026 ء کیلئے ٹوٹل 12ٹیموں نے براہ راست کوالیفائی کیا ہے۔ میزبان سری لنکا اور بھارت کے علاوہ افغانستان نے بھی کوالیفائی کیا، دیگر ٹیموں میں آسٹریلیا، جنوبی افریقہ ‘ بنگلہ دیش، انگلینڈ، ویسٹ انڈیز، امریکہ، آئرلینڈ اور نیوزی لینڈ بھی شامل ہیں۔ ٹی ٹونٹی ورلڈ کپ 2026 ء میں ٹوٹل 20 ٹیمیں ایکشن میں ہوں گی جبکہ باقی 8ٹیموں کا انتخاب گزشتہ ٹی ٹونٹی ورلڈ کپ کی طرح ریجنل کوالیفائر کے ذریعے ہوگا۔ ٹی ٹونٹی ورلڈ کپ 2026 ء حال ہی میں ختم ہونے والے ٹی ٹونٹی ورلڈ کپ کے فارمیٹ پر ہی کھیلا جائیگا ۔