اپوزیشن کا آج پنجاب اسمبلی کے باہر اجلاس بلانے، احتجاج کا اعلان

لاہور (نوائے وقت رپورٹ) اپوزیشن لیڈر پنجاب اسمبلی ملک احمد خان بھچر نے کہا کہ ہم آج پنجاب اسمبلی کے باہر اپنا اجلاس بلائیں گے۔ ملک احمد خان بھچر نے میڈیا سے گفتگو کرتے ہوئے کہا اجلاس میں وزیراعلیٰ کے خلاف احتجاج کریں گے، ہمارا اجلاس آج گیارہ بجے ہوگا۔ انہوں نے کہا ہمارے کسی ایم پی اے پر ایف آئی آر کردی اور کسی کے گھر میں پولیس بھجوا دی، ہمارے 11 ایم پی ایز کو معطل کر دیا گیا۔ اپوزیشن لیڈر پنجاب اسمبلی نے کہا اصل بات رویوں کی ہے، آپ ایک طرف عوام دشمن بجٹ دے رہی ہیں، آپ اپنے سپیکر سے غصہ نکلوا رہے ہیں، اسمبلی میں اس سے بڑے بڑے احتجاج ہوئے ہیں، چودھری پرویز الہیٰ کے وقت آپ نے اسمبلی میں کرسیاں توڑ دی تھیں۔ انہوں نے کہا کہ اسمبلی کی تاریخ میں اپوزیشن چیمبر کو تالا نہیں لگا، ہم اسمبلی میں آپ کے اپوزیشن چیمبر یا گاڑیوں کیلئے نہیں آتے، یہ جعلی مینڈیٹ آپ کو لے بیٹھے گا، آپ ہمارا سامنا نہیں کرپا رہیں تو 12 کروڑ عوام کا سامنا کیسے کریں گی۔ ملک احمد خان بھچر نے مزید کہا کہ ہم آپ کے خلاف تحریک شروع کرنے جا رہے ہیں۔