وزیراعلٰی پنجاب کا وزیراعلٰی سندھ نے کراچی ائیرپورٹ پر استقبال کیا۔ جب قائم علی شاہ ائیرپورٹ سے باہر نکل رہے تھے تو لڑکھڑا گئے۔ شہباز شریف فوراً اُن کی جانب متوجہ ہوئے اور انہیں سنبھالا دیا۔ شہباز شریف اپنے دورے کے موقع پر مسلم لیگی رہنماؤں سے بھی ملاقات کریں گے۔ وزیراعلٰی سندھ سید قائم علی شاہ نے شہباز شریف سمیت مسلم لیگ نون سندھ کے صدر اسماعیل راہو اور مسلم لیگ نون کے ارکان اسمبلی کو ظہرانے پر وزیراعلٰی ہاؤس میں مدعو کیا۔ شہباز شریف پنجاب ہاؤس میں مسلم لیگ نون کے وفد سے ملاقات بھی کریں گے، اس ملاقات کے لیے مسلم لیگ نون کے رہنماؤں اسماعیل راہو ،سلیم ضیا، شاہ محمد شاہ ، راحیلہ مگسی ، شیرازی برادران ، عرفان اللہ مروت، نہال ہاشمی ، ہمایوں خان، شفیع جاموٹ اور دیگر شامل ہونگے۔ ذرائع کا کہنا ہے کہ لیگی رہنما سندھ حکومت کے نامناسب رویے اور ان کے علاقوں میں ترقیاتی کام نہ کرانے کے حوالے سے شکایت بھی کریں گے۔ ٹھٹھہ کے شیرازی برادران کو سندھ حکومت سے سخت تحفظات ہیں، اس حوالے سے وہ وزیراعظم کو آگاہ کر چکے ہیں۔ شہباز شریف نے گورنر سندھ سے ملاقات بھی کی ہے۔