چارسدہ (نوائے وقت نیوز) چارسدہ میں پولیس نے کارروائی کرتے ہوئے کالعدم ٹی ٹی پی شیخ خالد گروپ کے انتہائی مطلوب 2 دہشتگرد گرفتار کر لئے کارروائی کے دوران اسلحہ اور گولہ بارود برآمد کرلیا۔ جبکہ بہا ولنگر سے 4دہشت گر د پکڑ ے گئے۔ ڈی پی او چارسدہ سہیل خالد نے پریس کانفرنس کرتے ہوئے کہا پولیس نے مندنی کے علاقہ میں کارروائی کرتے ہوئے چارسدہ کو بڑی تباہی سے بچا لیا۔ ان کا کہنا تھا انہوں نے انٹیلی جنس اداروں کی اطلاع پر کالعدم تحریک طالبان پاکستان شیخ خالد گروپ کے دو خطرناک دہشت گرد کمانڈر الیاس اور داﺅد گرفتار کر لیا۔ جن کی نشان دہی پر پولیس نے مندنی میں ایک گھر پر چھاپہ مار کر اسکے رہائشی کمرے سے بھاری مقدار میں بارودی مواد اور اسلحہ برآمد کر لیا۔ ڈی پی او نے کہا ملزمان سے دو خودکش جیکٹس ، نو عدد میزائل ،تیس کلو گرام بارود ، 100 دستی بم ، ایک راکٹ لانچر اور نو عدد راکٹ اور دیگر اسلحہ قبضہ میں لے لیا ، ملزمان بم دھماکے ، ٹارگٹ کلنگ ، بھتہ خوری کے علاوہ 109 دیگر وارداتوں میں ملوث ہیں ، ایک فرار ملزم ساجد زمان کے سر کی 15 لاکھ روپے کا انعام رکھا گیا ہے۔
دہشتگرد گرفتار