لاہور(سپورٹس ڈیسک )تین مرتبہ کے فرنچ اوپن چیمپئن سرینا ولیمز تیسرے رائونڈ میں اپ سیٹ شکست کے بعد ٹائٹل کی دوڑ سے باہر ہو گئیں، میڈیسن کیز، مارکیٹا وونڈروسووا، ایشلی بارٹی اور سوفیا کینن پیش قدمی برقرار رکھتے ہوئے سال کے دوسرے گرینڈ سلام ٹینس ٹورنامنٹ فرنچ اوپن ویمنز سنگلز پری کوارٹر فائنل میں داخل ہو گئیں۔فرانس میں جاری ایونٹ میں کھیلے گئے ویمنز سنگلز تیسرے رائونڈ میچز میں ان سیڈڈ امریکن کھلاڑی سوفیا کینن نے عمدہ کارکردگی کا مظاہرہ کرتے ہوئے شہرہ آفاق ہم وطن کھلاڑی سرینا ولیمز کو 6-2 اور 7-5 سے اپ سیٹ شکست دے کر ایونٹ سے باہر کر دیا، امریکن کھلاڑی میڈیسن کیز بھی تیسری رکاوٹ عبور کرنے میں کامیاب رہیں، انہوں نے بلنکووا کو شکست فاش سے دوچار کیا، آسٹریلوی کھلاڑی ایشلی بارٹی نے پیٹکووچ کو ہرا کر ایونٹ سے باہر کر دیا۔ جلینا اوسٹاپینکو اور لوئیڈمیا کشی نوک نے ویمنز ڈبلز کوارٹر فائنل میں جگہ بنا لی۔پری کوارٹر فائنل میں لٹوین کھلاڑی اوسٹاپینکو اور ان کی یوکرینی جوڑی دار کشی نوک نے جمہوریہ چیک کی بربورا سٹرائیکووا اور ان کی تائیوان کی جوڑی دار سائی سو وائی کو 7-5 اور 6-1 سے ہرا کر کوارٹر فائنل تک رسائی حاصل کی۔گوئیڈو پیلا اور ڈائیگو شواٹزمان پر مشتمل ارجنٹائنی جوڑی نے مینز ڈبلز کوارٹر فائنل میں جگہ بنا لی۔پری کوارٹر فائنل میں گوئیڈو پیلا اور ڈائیگو شوارٹزمان نے کوئنٹن ہیلیز اور گریگوئر بریری پر مشتمل فرانسیسی جوڑی کو 6-4 اور 6-4 سے ہرا کر کوارٹر فائنل تک رسائی حاصل کی۔ مینز سنگلز میں سوئٹزرلینڈ کے راجر فیڈرر ‘سپین کے رافیل نڈال اور ایس واورینکا کوارٹر فائنل میں پہنچ گئے ۔ رافیل نڈال نے لونڈیرو کو سٹریٹ سیٹس میں چھ دو ‘چھ تین اور چھ تین سے شکست دی۔ راجر فیڈرر نے ایل میئر کو چھ دو ‘چھ تین اور چھ تین سے زیر کیا ۔ وارورنیکا نے ٹسٹسپاس کو سخت مقابلے کے بعد آٹھ چھ ‘پانچ سات ‘چھ چار ‘تین چھ اور آٹھ چھ سے ہرا دیا ۔