انڈر 19 سٹی کرکٹ ٹورنامنٹس کی چار ایسوسی ایشنز کے چیمپئنز کا فیصلہ 

لاہور(سپورٹس رپورٹر) انڈر 19 سٹی کرکٹ ٹورنامنٹس کی چار کرکٹ ایسوسی ایشنز کے چیمپئنز کا فیصلہ ہوگیا ہے۔راولپنڈی سٹی کرکٹ ایسوسی ایشن نے ناردرن کرکٹ ایسوسی ایشن کے زیراہتمام منعقدہ انڈر 19 سٹی کرکٹ ٹورنامنٹ جیت لیا ہے۔ کے پی کرکٹ ایسوسی ایشن میں خیبرانڈر 19 ، سندھ کرکٹ ایسوسی ایشن میں کراچی زون ٹو انڈر 19 اورسنٹرل پنجاب کرکٹ ایسوسی ایشنز میں فیصل آباد انڈر 19 ٹیمیں فاتح قرار پائے ہیں۔راولپنڈی انڈر 19 نے اسلام آباد اور اٹک کی ٹیموں کو شکست دے کر ٹائٹل اپنے نام کیا، جہاں اٹک انڈر 19 نے دوسری اور اسلام آباد انڈر 19 نے تیسری پوزیشن حاصل کی۔خیبرپختونخوا کرکٹ ایسوسی ایشن کے زیراہتمام انڈر 19 سٹی کرکٹ ٹورنامنٹ میں خیبر انڈر 19 نے چارسدہ کو فائنل میں 79 رنز سے شکست دی۔ سنٹرل پنجاب میں کھیلے گئے انڈر 19 ٹورنامنٹ میں فیصل آباد نے منڈی بہاؤالدین کو پانچ وکٹوں سے ہرایا۔ کراچی زون 2 نے کراچی زون 6 کو 53 رنز سے شکست دیکر ٹائٹل جیت لیا ۔