وزیر آباد (نامہ نگار) بجلی کی غیر اعلانیہ لوڈ شیڈنگ، شہری سخت گرمی میں گیپکو حکام کو بد دعائیں دیتے رہے‘ گیپکو گرڈ وزیر آباد میں پاور کیبل کے برسٹ ہونے سے شہر کے مختلف فیڈرز جن میں دھونکل، مولانا ظفر علی خان، پپلی والا اور حاجی پورہ شامل ہیں، پر  بجلی کی سپلائی 3گھنٹے بند رہی۔ شہری پانی کی بوند بوند کو ترس گئے۔ بچے اور بوڑھے شدید گرمی کی وجہ سے بلبلا اٹھے جبکہ مذکور فیڈرز پر قائم نجی انڈسٹریز بھی بند رہیں۔ گیپکو ذرائع سے معلوم ہواکہ گیپکو گرڈ سٹیشن وزیرآباد میں واقع دو فیڈرز کی پاور کیبل گرمی کی شدت اور لوڈ کی زیادتی کی وجہ سے برسٹ کر گئیں جس کے لیے گوجرنوالا سے سپیشل ٹیم کو منگوایا گیا اور تاروں کی مرمت کی گئی۔