نئی دہلی (نیوز ڈیسک) بھارتی ریاست کرناٹک میں ملک کی حکمران جماعت بی جے پی سے تعلق رکھنے والے رکن لوک سبھا نے اسلام کیخلاف ہرزہ سرائی کی۔ کناڈا بالائی سے منتخب ہونیوالے آنند کمار نے گزشتہ روز سرسی میں پریس کانفرنس کے دوران اسلام کیخلاف اپنے خبث باطن کا اظہار کیا جس پر کرناٹک اور دیگر ریاستوں کی مسلمان اور سیکولر تنظیمیں سراپا احتجاج بن گئیں اور آنند کمار کیخلاف سخت کارروائی کا مطالبہ کیا۔ سرسی پولیس نے آنندکمار کیخلاف مقدمہ درج کر لیا تاہم گرفتاری عمل میں نہیں لائی گئی۔