پوٹرو، اینڈرسن، فلورین لوپزمیکسیکو اوپن ٹینس مینز سنگلز کوارٹر فائنل میں

میکسیکو سٹی (آئی این پی)ڈیل پوٹرو، کیون اینڈرسن، فلورین لوپز، الیگزینڈر زیوریف، ہریسن، ڈومنک تھائم، ڈونلڈسن اور ہیون چنگ پیش قدمی برقرار رکھتے ہوئے میکسیکو اوپن ٹینس ٹورنامنٹ مینز سنگلز کوارٹر فائنل میں پہنچ گئے۔ میکسیکو میں جاری ایونٹ میں گزشتہ روز کھیلے گئے مینز سنگلز پری کوارٹر فائنلز میں ارجنٹائنی کھلاڑی ڈیل پوٹرو نے اسپینش کھلاڑی ڈیوڈ فیرر کو 6-4، 4-6 اور 6-3 سے ہرا کر کوارٹر فائنل کیلئے کوالیفائی کیا۔جنوبی افریقن کھلاڑی کیون اینڈرسن نے فرانسیسی کھلاڑی منارینو کو سٹریٹ سیٹس میں 6-3 اور 6-4 سے ہرا کر ایونٹ سے باہر کر دیا، اسپینش کھلاڑی فلورین لوپز بھی پری کوارٹر فائنل آزمائش میں سرخرو رہے، انہوں نے آسٹریلوی کھلاڑی تھناسی کوکناکس کو شکست دی۔ جرمنی کے الیگزینڈر زیوریف نے ہم وطن کھلاڑی گوجوشک کو زیر کیا۔ کینیڈا کے ڈومنک تھائم نے شپووالوو کوہرایا، جنوبی کوریا کے ہیون چنگ نے امریکن کھلاڑی ایسکوبیدو اور امریکہ کے ڈونلڈسن نے ایبدین کو ہرا کر کوارٹر فائنل میں جگہ بنائی۔