قومی اسمبلی میں اپوزیشن لیڈر خورشید شاہ نے کہا ہے کہ سینیٹ الیکشن کے لئے پولنگ سے تمام قیاس آرائیاں دم توڑ گئی ہیں ۔پارلیمنٹ ہائوس کے باہر میڈیا سے گفتگو کرتے ہوئے قومی اسمبلی میں قائد حزب اختلاف سید خورشید شاہ نے کہا کہ ہمیشہ خواہش رہی ہے کہ اسمبلیاں اپنی مدت پوری کریں اب دوسری بار اسمبلیاں اپنی مدت پوری کرنے جارہی ہیں اور آج سینیٹ انتخابات کے انعقاد نے تمام افواہوں کا خاتمہ کردیا ہے۔خورشید شاہ کا کہنا تھا کہ اس دفعہ اعتزازاحسن جیسے دیرینہ ساتھی پارلیمنٹ کا حصہ نہیں رہیں گے، پرانے دوستوں کے نہ ہونے سے فرق پڑتا ہے ، لیکن سیاست رکتی نہیں، چلتی رہتی ہے۔بعد ازاں اپوزیشن لیڈر قومی اسمبلی ہال روانہ ہوئے، جہاں انہوں نے پیپلز پارٹی کے نوید قمر اور نفیسہ شاہ کے بعد اپنا ووٹ کاسٹ کیا۔