کراچی:  نوجوان نے بس ہوسٹس کو گولی مارکرخودکشی کر لی

 کراچی (آن لائن)  کراچی میں نوجوان نے بس ہوسٹس کو گولی مارکرخودکشی کر لی۔  ایم اے جناح روڈ پر تاج کمپلکس انٹرسٹی بس اڈے کے قریب فائرنگ سے ایک نوجوان جاں بحق جبکہ نوجوان لڑکی شدید زخمی ہوگئی۔ فائرنگ سے جاں بحق ہونے والے نوجوان کی نعش سول جبکہ زخمی لڑکی کوجناح ہسپتال منتقل کردیا گیا جہاں لڑکی کی حالت تشویشناک بنائی جاتی ہے۔ ایس ایچ او تھانہ بریگیڈ ماجد کورائی کے مطابق فائرنگ سے ہلاک ہونیوالے نوجوان کی شناخت 21 سالہ ملک شاہ زیب اورزخمی لڑکی شناخت 23 سالہ تنزیلا عرف ایمان کے نام سے کرلی گئی ہے۔ فائرنگ سے جاں بحق ملک شاہ زیب انٹرسٹی بس پر ملازمت کرتا تھا جبکہ زخمی لڑکی بھی انٹر سٹی بس سروس کی ملازمہ اور بس ہوسٹس ہے۔ ہلاک نوجوان کاآبائی تعلق تحصیل کلرکلہار چکوال سے تھا جبکہ زخمی لڑکی بہاولپور کی رہائشی ہے۔ پولیس کا کہنا ہے کہ ابتدائی طور پر واقعہ پسند نہ پسند کا معلوم ہوتا ہے۔ فائرنگ کے واقعے کی سی سی ٹی وی فوٹیج حاصل کر لی گئی۔