لاہور(سپورٹس رپورٹر)کرنل فتح شیر خان میموریل کلب کرکٹ ٹورنامنٹ لاہور میں شروع ہو گیا، افتتاحی میچ میں ماڈل ٹاون گرینز نے پنڈی جم خانہ کو 4 وکٹوں سے شکست دیدی۔ ماڈل ٹاون گرینز کرکٹ اکیڈمی گراونڈ میں شروع ہونیوالے کلب ٹورنامنٹ کا افتتاح صدر ماڈل ٹاون سوسائٹی داود باری نے کیا۔ اس موقع پر لاہور کی کلبوں کے آرگنائزرز کی بڑی تعداد بھی موجود تھی۔ افتتاحی میچ میں پنڈی جم خانہ ٹیم نے 8 وکٹوں پر 174 رنز بنائے، جمعہ خان نے 68 اور شیخ عدیل نے 25 رنز بنائے۔ اسد علی نے دو جبکہ احمد عارف، ایم گلفام اور وارث خان نے ایک ایک وکٹ حاصل کی۔ ماڈل ٹاون گرینز نے ہدف 6 وکٹوں پر پورا کر لیا۔ ایم عظیم نے 60 اور ایم فہد نے 51 رنز کی  اننگز کھیلی۔ ایم شیان نے دو جبکہ عمر انجم اور عاطف نے ایک ایک کھلاڑی کو آوٹ کیا۔