کراچی (اسپورٹس رپورٹر) جرمن قونصلیٹ ڈاکٹر رودیگار لوٹز نے کہا ہے کہ لیاری کی خواتین باکسرز کا ٹیلنٹ دیکھ کر میں بہت متاثر ہوا ہوں اور امید رکھتا ہوں کہ یہ اپنے وطن پاکستان کا نام ملکی اور بین الاقوامی سطح پر روشن رکھیں گے وہ ینگ لیاری باکسنگ کلب کے دورے کے موقع پر علاقے کے معززین اور خواتین باکسروں سے خطاب کررہے ہیں تھے۔ انہوں نے کہا کہ لیاری میں مردوں کے ساتھ ساتھ خواتین کا اسپورٹس میں دلچسپی قابل دید ہے۔ پیپلزپارٹی کے رہنما نادر نبیل گبول نے کہا ہے کہ لیاری کھیلوں کا مرکز اور امن کا گہوارہ ہے اور یہاں سے فٹ بال، باکسنگ، جمناسٹک اور کئی کھیلوں کے نیشنل اور انٹرنیشنل کھلاڑی پیدا ہوئے۔ اس موقع پر لیاری سے پیپلز پارٹی کے سینئر رہنما نادر نبیل گبول، سندھ باکسنگ ایسوسی ایشن کے صدر اصغر بلوچ، نائب صدر عابد بروہی، سیکریٹری جنرل عبدالرزاق بلوچ کے علاوہ سابق انٹرنیشنل باکسر محمد امین، عدنان بلوچ اور کلب کے کوچ نواب علی موجود تھے۔