گوجرانوالہ ن لیگ ن کا قلعہ،مریم نواز کا پرتپاک استقبال ہوگا:  عمران خالد، شعیب بٹ 

گوجرانوالہ (نمائندہ خصوصی ) سابق ایم پی اے عمران خالد بٹ ،سٹی صدر سلمان خالد پومی بٹ ،سینئر نائب صدر محمد شعیب بٹ ، لیگی رہنما ظفر اقبال ، صلاح الدین ڈار، عمر فاروق ڈار ،شاذب ڈار ، جمشید ایوب بٹ ،خواجہ تنویر اشرف ،بلال ظفر نے کہا ہے کہ گوجرانوالہ لیگی شیروں ‘محب وطن بہادروں اور اپنے عظیم قائد میاں محمد نواز شریف سے حقیقی محبت کرنے والوں کا شہر ہے، پہلوانوں کے شہر کے غیور عوام نے ہر سیاسی میدان میں ہمیشہ اپنے قائدین کو بے پناہ محبت سے نوازا ہے، اسی وجہ سے قائدین گوجرانوالہ سے تعلق رکھنے والے ہر ادنیٰ ورکر سے لیکر مقامی قیادت تک فخر محسوس کرتے ہیں، انہوں نے کہا آج مسلم لیگ ن کی چیف آرگنائزر وسینئر نائب صدر مریم نواز شریف کا پرتپاک استقبال کرکے ایک مرتبہ پھر ثابت کر دیں گے کہ پہلوانوں کا شہر آج بھی مسلم لیگ ن کا ہی قلعہ ہے ، مریم نواز شریف کا استقبال کرنے کیلئے لیگی کارکنوں کا جوش و لولہ دیدنی ہے ، انہوں نے کہا مسلم لیگ ن الیکشن سے بھاگنے والی جماعت نہیں ہے ،ہم نے ہمیشہ اپنے قائد و سابق وزیر اعظم میاں محمد نواز شریف کی قیادت میں ہر سیاسی میدان میں مخالفین کا ڈٹ کر مقابلہ کیا ہے ، جب سیاسی میدان سجا تو ملک کو تباہی کے دہانے پر پہنچانے والے سیاسی مداریوں کودن میں تارے دکھا دیں گے ، اب عوام انکے جھانسے میں نہیں آنیوالے وہ جتنے مرضی جتن کر لیں لوگ انہیں ووٹوں کی طاقت سے مسترد اور میدان سیاست سے آئوٹ کر دینگے ۔