پاکستان سپر لیگ کا معیار آئی پی ایل جیسا انجوائے کر رہا ہوں: جارڈن کاکس

لاہور(سپورٹس رپورٹر)اسلام آباد یونائیٹڈ میں شامل انگلینڈ کے وکٹ کیپر بیٹر جارڈن کاکس نے کہا ہے کہ پاکستان سپر لیگ میں مقابلے کا معیار بھارتی کرکٹ لیگ آئی پی ایل جیسا ہی ہے۔ اسلام آباد میں اپنا ٹائم انجوائے کر رہا ہوں۔ ٹیم بہترین ہے۔ مائیک ہیسن بہترین کوچ ہیں، ان کے ساتھ کام کرکے مزہ آرہا ہے۔ راولپنڈی میں ہونیوالے میچز میں ٹیم اچھے نتائج کیلئے پْرامید ہے۔ امید ہے کہ ہمشہ کی طرح اس بار بھی پنڈی میں فل ہاؤس ہوگا، پچھلے سال یہاں لاہور قلندرز کی جانب سے کھیلا تھا۔ راولپنڈی میں اسلام آباد یونائٹیڈ کو ناقابل یقین سپورٹ ملتی ہے۔ٹیم میں اپنے کردار پر بات کرتے ہوئے جارڈن کا کہنا تھا کہ میرے لئے ذاتی ریکارڈ سے زیادہ اہم ٹیم کی جیت ہے۔ ٹیم میں میرا کردار ایک فنشر کا ہے، کوشش ہوتی ہے اس کو بخوبی نبھاؤں۔ پاکستان سپر لیگ میں اعلیٰ معیار کا مقابلہ ہوتا ہے۔ پی ایس ایل میں مقابلے کا معیار آئی پی ایل جیسا ہی ہے۔پی ایس ایل میں مقامی کرکٹرز کا ٹیلنٹ کافی زبردست ہے، نوجوان کھلاڑیوں کیلئے یہاں ٹاپ پلیئرز کیساتھ کھیلنا بڑی بات ہے۔ یہاں کے نوجوان کرکٹرز بہت تیزی سے سیکھنے کا عمل مکمل کرتے ہیں۔ پچھے سال لاہور کیساتھ ٹرافی جیتی تھی، اس بار اسلام آباد کیساتھ یہ کارنامہ انجام دینا ہے۔ میرا سب سے بڑا ہدف انگلینڈ کیلئے کھیلنا ہے لیکن ابھی اس دوڑ میں شامل نہیں۔ مجھے ابھی اپنا گیم اور بھی بہتر کرنا ہے، پھر اس دوڑ میں شامل ہوں گا۔ پی ایس ایل میں اپنے کھیل کو مزید نکھارنے کی کوشش ہوگی۔