لاہور (نمائندہ سپورٹس+سپورٹس رپورٹر) قومی والی بال ٹیم کا دورہ ا یران منسوخ ہوگیا ہے۔ قومی والی بال ٹیم نے اسلامک گیمز اور ورلڈ چیمپئن شپ کوالیفائرز کی تیاری کے لئے تہران میں پانچ پریکٹس میچز کھیلنے تھے۔ہمسایہ ملک میں سیریز کھیلنے کے تمام انتظامات مکمل کرلیے گئے تھے۔لیکن قومی ٹیم مالی اور این او سی کے مسائل کے باعث ایران کے لئے اڑان ہی نہ بھر سکی۔پاکستان والی بال فیڈریشن کا کہنا تھا کہ ایران نے 5پریکٹس میچز کے لئے تمام انتظامات مکمل کرلیے تھے لیکن ٹیم کو نہیں بھیجا جا سکا،جس پر ہمیں بہت شرمندگی محسوس ہو رہی ہے۔قومی والی بال ٹیم کو 12سے22 مئی کو باکو میں اسلامک گیمز میں شرکت کرنی ہے جبکہ اسی ماہ کے آخر میں ورلڈ چیمپئن شپ کوالیفائر کا آغاز بھی ہو رہا ہے۔ان کا کہنا تھا کہ بغیر کسی بین الاقوامی دورے یا پریکٹس میچز کے ٹیم انٹر نیشنل میچز میں اپنی اچھی کارکردگی کیسے دکھاسکتی ہے؟