علی پور چٹھہ: ٹرالی سے ٹکرانے پر 2 موٹر سائیکل سوار دوست جاں بحق

علی پور چٹھہ (نامہ نگار) گورنمنٹ بوائز سکول کے ٹیچرکا جواں سالہ بیٹا دوست کے ہمراہ موٹر سائیکل ٹرالی حادثے میں جاں بحق ہو گیا۔ منچر چٹھہ سے علی پور چٹھہ آتے ہوئے سڑک پر کھڑی ٹرالی سے ٹکر ا گئے، 2 نوجوان میتوں پر فضا سوگوار اور ہر آنکھ اشکبار ہو گئی۔ گورنمنٹ سکول کے ٹیچر شوکت علی چٹھہ کا 18سالہ نوجوان بیٹا امیر حمزہ اور اس کا 19سالہ دوست ندیم احمد گزشتہ رات موٹر سائیکل پر نواحی گائوں منچر چٹھہ سے علی پور چٹھہ آرہے تھے کہ راستے میں کھڑی ٹرالی سے ٹکڑا گئے۔ دونوں موقع پر ہی جاں بحق ہو گئے۔ راہگیروں نے جیب میں موجود ان کے شناختی کاغذات کی مدد سے نوجوانوں کے گھروں میں اطلاع دی جس پر نعشیں ان کی رہائش گاہوں پر منتقل کر دی گئیں۔ نوجوانوں کی نعشیں ایک ساتھ اٹھائی گئیں تو علاقے میں کہرام مچ گیا۔ ہر آنکھ اشکبار تھی۔ عوامی سماجی حلقوں نے 2 نوجوانوں کی ناگہانی اموات پر گہرے رنج و غم کا اظہار کیا۔