معاشرتی مسائل حل کرنے کیلئے مخیر حضرات آگے آئیں:پروین سرور

لاہور( لیڈی رپورٹر ) گور نر پنجاب کی اہلیہ بیگم پروین سرور نے کہا ہے کہ انسانیت کی خدمت ہی ہمارا مشن ہے ‘معاشرے کے مسائل کے حل کیلئے مخیرحضرات کو آگے بڑھ کر اپنا کردار ادا کر نا ہوگا ‘اورسیز پاکستانیوں کی اپنے ملک کے ساتھ محبت کو الفاظ میں بیان نہیں کیا جاسکتا ۔ان خیالات کا اظہار گور نر پنجاب کی اہلیہ اور سرور فائونڈیشن کی وائس چیئر پر سن بیگم پروین سرورنے سرور فائونڈیشن کے مر کزی دفتر میں یو ای اے سے آنیوالے ڈونر خان زمان اور ڈاکٹر سہیل سمیت دیگر سے موبائل فلٹر یشن پلانٹ کے افتتاح کے موقع پر گفتگو کرتے ہوئے کیا ۔گور نر پنجاب کی اہلیہ وائس چیئر پرسن سرور فائونڈیشن پروین سرور نے موبائل فلٹر یشن پلانٹ عطیہ کر نے پر خان زمان کا شکر یہ ادا کر تے ہوئے کہا کہ اس میں کوئی شک نہیں کہ ملک کو مسائل سے نجات دلانے اور غر یب عوام کو پینے کے صاف پانی کی فراہمی کیلئے معاشرے کے تمام طبقات کو آگے آنا ہوگا ۔ انہوں نے کہا کہ سرور فائونڈیشن نے پنجاب کے عوام کو پینے کے صاف پانی انکے گھر کی دہلیز پر فراہم کر نے کا مشن شروع کر رکھا ہے جسکے لیے اب تک ڈیڑھ سو سے زائد فلٹر یشن پلانٹس لگائے جا چکے ہیں۔