وزیرمملکت پارلیمانی امور علی محمد خان نے سینیٹ کو بتایا کہ پاک چین اقتصادی راہداری کے تحت بوستان سمیت نو خصوصی اقتصادی زون قائم کئے جائیں گے۔وقفہ سوالات کے دوران مختلف سوالات کا جواب دیتے ہوئے انہوں نے کہا کہ بوستان میں مجوزہ خصوصی اقتصادی زون کو لسبیلہ منتقل کرنے کے بارے میں کوئی اطلاع نہیں ہے۔انہوں نے کہا کہ پاکستان کی جانب سے صنعتی تعاون کا سیکرٹریٹ ہونے کی وجہ سے بورڈ آف انوسٹمنٹ نے صوبائی حکومتوں کو خصوصی اقتصادی زون کی جلد ترقی کے لئے ہرممکن حمایت اور تعاون فراہم کیا۔انہوں نے کہا کہ یہ بات قابل ذکر ہے کہ بوستان کے خصوصی اقتصادی زون میں کام کے آغاز کے لئے تاریخ اور وقت کا تعین بورڈ آف انوسٹمنٹ کو بلوچستان کی حکومت کی جانب سے خصوصی اقتصادی زون کی درخواست موصول ہونے کے بعد کیا جا سکتا ہے۔