عید الفطرمسلمانوں کیلئے خاص تحفہ ہے،میرچنگیز خان جمالی`

کوئٹہ ( بیورورپورٹ) پیپلز پارٹی بلوچستان کے صدرمیر چنگیز خان جمالی ،جنرل سیکرٹری روزی خان کاکڑ،سیکرٹری اطلاعات سردارسربلند جوگیزئی نے اہل پاکستان اور پوری امت مسلمہ کو عید الفطر کی مبارک باد دیتے ہوئے کہاکہ عید الفطر اللہ تعالیٰ کی جانب سے  ایک خاص تحفہ ہے اور ماہ رمضان ہمیں صرف  بھوک اور پیاس برداشت کرنے کا درس نہیں دیتا بلکہ اپنے نفس پر قابو پا کر تمام برائیوں سے دور رہنے کی تربیت بھی فراہم کرتا ہے۔ انہوں نے کہا کہ مسلمان روزے کے فلسفے کو سمجھ کر اسکی روح کے مطابق عبادات کرتے ہیں اللہ ان کی عبادات و دعاؤں کو شرف قبولیت بخشتا ہے۔ انہوں نے کہا کہ تمام صاحب حیثیت لوگ عید کی خوشیوں میں ان لوگوں کو بھی شریک کریں جو عید منانے کی استطاعت نہیں رکھتے تاکہ وہ بھی عید کی خوشیاں مناسکیں۔ انہوں نے علماء کرام اورعوام سے اپیل کی کہ وہ نماز عید کے اجتماعات میں ملک کی ترقی و خوشحالی کیلئے خصوصی دعائیں کریں۔