لاہور(سپورٹس رپورٹر)پاکستان کر کٹ کی تاریخ کے دس عظیم کھلاڑی پاکستان بھارت کر کٹ سیریز دیکھنے کے لئے بھارت جائیں گے ۔پی سی بی کی ایگزیکٹو کوآرڈی نیشن کمیٹی نے چیئرمین پی سی بی کی صدارت میںہو نے والے اجلا س میں فیصلہ کیا کہ ملکی کر کٹ کی تاریخ میں نمایاں خدمات انجام دینے والے عظیم کھلاڑیوں کوپاکستان بھارت سیریز کے دوران خیر سگالی کے جذبے کے تحت اپنا سفیر بناکر بھارت بھیجا جائے ،۔جن کر کٹرز کو بھارت بھجوایا جائے گا ان میں حنیف محمد ،امتیاز احمد ،ماجد خان ،ظہیر عباس ،مشتاق محمد ،عمران خان ،جاوید برکی ،وسیم باری ،انتخاب عالم اور صادق محمد شامل ہیں ۔بورڈ کی کوآرڈینیشن کمیٹی کے فیصلے کے مطابق ہر میچ میں دو عظیم کھلاڑی پاک بھارت میچ دیکھنے کے لئے سٹیڈیم میں موجود ہوں گے ۔یہ کھلاڑی پی سی بی کے سفیر کی حیثیت سے دونوں ممالک کے درمیان کر کٹ روابط کو بہتر بنانے میں معاون ثابت ہوں گے ۔