مصباح پر تنقید کرنیوالوں کو سوچ بدلنی چاہئے: والد ہ

میانوالی (آئی این پی) پاکستان ٹیسٹ ٹیم کے کپتان مصباح الحق کی والدہ نے کہا ہے کہ میرے بیٹے پر تنقید کرنے والوں کو اب اپنی سوچ بدل لینی چاہیے‘ مصباح نے عمدہ کارکردگی کے ذریعے ملک کا نام روشن کیا ہے‘بیٹے کی صلاحیتوں پر اعتماد تھا وہ پاکستان کیلئے کوئی بڑا کارنامہ انجام دے گا اور مصباح نے میرے خواب کو سچ کر دکھایا۔ اتوار کو قومی کرکٹ ٹیم کے کپتان مصباح الحق کی جانب سے ٹیسٹ کرکٹ کی تاریخ میں سب سے تیز ترین نصف سنچری اور سنچری بنانے پر ان کی والدہ نے اللہ کا شکر ادا کرتے ہوئے کہا کہ میرے بیٹے پر تنقید کرنے والوں کو اب اپنی سوچ بدل لینی چاہیے۔ انہوں نے کہا کہ میرے بیٹے نے اپنی عمدہ کارکردگی سے ملک کا نام روشن کیا ہے۔ بیٹے نے اچھی کارکردگی دکھاتے ہوئے خود پر ہونے والی تنقید کا خوبصورت جواب دیا ہے۔ اپنے بیٹے کی صلاحیتوں پر اعتماد تھا وہ پاکستان کیلئے کوئی بڑا کارنامہ انجام دے گا اور مصباح نے میرے خواب کو سچ کر دکھایا۔