لاہور (کامرس رپورٹر) زرعی اجناس کی الیکٹرانک تجارت کو پاکستان مرکنٹائل ایکسچینج‘ پاکستان کے واحد کمو ڈیٹی فیوچرز ایکسچینج، کے پلیٹ فارم سے فروغ دینے اور زراعت کے شعبے میں شراکت داروں کے مفادات کے تحفظ کے لئے سکیورٹیز اینڈ ایکسچینج کمیشن آف پاکستان نے پی ایم ای ایکس پر لسٹنگ کے لئے سپر باسمتی دھان چاول فیوچرز کانٹریکٹس کی منظوری دے دی۔ اس سے قبل، اگست 2015 میں ایس ای سی پی نے سرخ مرچ فیوچرز کانٹریکٹ کی بھی منظوری دی تھی جسے آزمائشی دور کی کامیابی پر بعدازاں بھرپور طریقے سے لانچ کیا گیا۔ حالیہ فصل میں ایک ہزار ٹن سے زائد سرخ مرچ کی الیکٹرانک پلیٹ فارم کے ذریعے تجارت ہوئی۔پی ایم ای ایکس پلیٹ فارم کے استعمال کے فوائد میں اجناس کے معیار کی جانچ، چوبیس سے اڑتالیس گھنٹوں میں تیز ترین ادائیگی، قیمت میں شفافیت‘حوالگی اور تصفیہ کی ضمانت کا انتظام بھی شامل ہے۔ ایس ای سی پی نے پاکستان میں پی ایم ای ایکس پلیٹ فارم کے استعمال پر تاجروں کی حوصلہ افزائی کے ذریعے زرعی اجناس کی تجارت میں اصلاحات لانے کے لئے پر عزم ہے۔