اسلام آباد (سپیشل رپورٹ) پاکستان ائرفورس ویمن ایسوسی ایشن کے زیراہتمام دو روزہ آرٹ نمائش پی اے ایف کمپلیکس اسلام آباد میں ہوئی۔ صدر ڈاکٹر عارف علوی کی بیگم ثمینہ علوی نے افتتاح کیا۔ وہ نمائش میں مہمان خصوصی بھی تھیں۔ نمائش کی جگہ پہنچنے پر پی اے ایف ویمن ایسوسی ایشن کی صدر نے انکا استقبال کیا۔ بیگم چیئرمین جائنٹ چیفس آف سٹاف کمیٹی‘ مسلح افواج کے سربراہوں کی بیگمات‘ سفیروں دوسرے اعلیٰ حکام نے نمائش میں شرکت کی۔ ایسوسی ایشن کا قیام 1965 ء میں عمل میں آیا۔ پی اے ایف کے کم تنخواہ پانے والے ملازمین کی فلاح و بہبود خاص طور پر ان کے بچوں کی تعلیم اور دوسرے فلاحی کاموں میں ایسوسی ایشن نے اہم کردار ادا کیا ہے۔