وزیراعظم کے اشارے پر پانچ پیاروں، انکے چمچوں پر زمین تنگ کردینگے: فواد چوہدری

اسلام آباد(نیوز رپورٹر+ اے پی پی) وفاقی وزیرسائنس اینڈ ٹیکنالوجی فواد چوہدری نے کہا ہے کہ وزیراعظم کے ایک اشارے پر ان پانچ پیاروں اور ان کے چمچوں پر زمین تنگ کردیں گے۔سماجی رابطے کی ویب سائٹ پر ٹویٹ کرتے ہوئے وفاقی وزیر نے آزادی مارچ والوں کو مخاطب کرتے ہوئے کہا کہ پی ٹی آئی حکومت کو کمزور سمجھنے کی غلطی نہ کرنا۔ ان کا کہنا تھا ہم اس لئے تحمل کا مظاہرہ کرتے ہیں کہ عمران خان نے یہ ہدایت کی ہے ورنہ ایک اشارے پر ان پانچ پیاروں اور ان کے چمچوں پر زمین تنگ کردیں اور انہیں کہیں چھپنے کی جگہ بھی نہیں ملے گی۔وزیر اعظم کی معاون خصوصی برائے اطلاعات و نشریات فردوس عاشق اعوان نے کہا ہے کہ اگر غور کیا جائے تو اس وقت کنٹینر پر وہ پانچ خاندان موجود ہیں جو ہمیشہ سے اس ملک پر حکمرانی کرتے رہے ہیں۔ ہفتہ کو سماجی رابطوں کی ویب سائٹ ٹویٹر پر اپنے ایک پیغام میں معاون خصوصی نے کہا کہ ان میں مفتی محمود خاندان ، اچکزئی خاندان ، ولی خان خاندان ،بھٹو خاندان اور شریف خاندان شامل ہیں۔ انہوں نے کہا کہ اب وہ اپنی اولادوں تک حکمرانی منتقل کرنے کے لئے ریاست پاکستان پر حملہ آور ہیں۔