فیروزوالہ+سرگودھا +لاہور (نامہ نگاران+ نمائندہ خصوصی) جی ٹی روڈ کی آبادی حدوکے مریدکے قریب تیز رفتار ویگن نے موٹر سائیکل سواروں کو ٹکڑ مار دی جس کے نتیجہ میں ساس اور بہو ہلاک اور نوجوان زخمی ہوگیا۔ حادثے کے بعد ڈرائیور  فرار ہو گیا۔ واہنڈو کا نوجوان ادریس والدہ اور بھاوج  کے ہمراہ موٹر سائیکل سوار ہو کر لاہور آ رہے تھے۔ حدو کے بس سٹاپ  کے قریب گوجرانوالہ سے آنے والی تیز رفتار ٹیوٹا ہائی ایس ویگن نے انہیں کچل ڈالا جس کے نتیجہ میں موٹر سائیکل سوار زاہدہ بی بی اور اس کی بہو زہرہ موقع پر جاں بحق ہو گئیں جبکہ ادریس زخمی ہوا۔ جسے طبی امداد کیلئے ہسپتال داخل کروا دیا گیا۔ پولیس نے واقعہ کی رپورٹ درج کر لی۔ سرگودھا میں تیز رفتار ڈمپر اور ٹرک کے موٹر سائیکل سواروں کو کچلنے کے دو مختلف واقعات میں باپ بیٹے سمیت پانچ افراد جاں بحق اور خاتون سمیت دو افراد زخمی ہو گئے۔ سرگودھا فیصل آباد روڈ کے گاؤں احمد نگر کا نوجوان اختشام احمد والد کے ہمراہ موٹر سائیکل پر آ رہے تھے کہ احمد نگر پٹرول  پمپ کے قریب تیز رفتار ڈمپر نے کچل دیا۔ دونوں موقع پر جاں بحق ہو گئے۔ دریا خان کے علاقہ کوٹلہ جام ڈیرہ روڈ پر کچہ نشیب سے موٹرسائیکل سوار سڑک پر مین روڈ پر آئے توسامنے سے آنے والے موٹر سائیکل سے ٹکرانے سے دونوں موٹر سائیکلوں پر سوار پانچ افراد کو سڑک پر گرتے ہی ڈیرہ اسماعیل خان سے آنے والے ٹرک نے کچل دیا۔ جس کے نتیجہ میں 51 سالہ زرک خان 16 سالہ عامر، تین سالہ کاشان موقع پر جاں بحق اور سعیداں بی بی، محمد شعیب شدید زخمی ہوگئے جن کو ریسکیو کر کے ڈی ایچ کیو ہسپتال منتقل کر دیا۔ ملتان روڈ ٹریفک حادثے میں دو افراد جاں بحق تین افراد زخمی ہوگئے۔ ملتان روڈ بحریہ 8کے قریب ٹرالر اور رکشہ کے درمیان تصادم میں رکشہ میں سوار دو افراد جاں بحق ہوگئے جبکہ تین افراد شدید زخمی ہو گئے۔