لاہور(سپورٹس رپورٹر)ویسٹ انڈیز ویمنز ٹیم کیخلاف سیریز کی تیاری کیلئے 18 رکنی قومی ویمن سکواڈ میں سے 12 نے منگل کی صبح نیشنل سٹیڈیم میں پریکٹس کی،سیریز میں پاکستان کی جانب سے متبادل کھلاڑیوں کو آزمائے جانے کا امکان ہے۔سٹیفنی ٹیلر کی قیادت میں مہمان ٹیم پیر کراچی پہنچی تھی،ون ڈے انٹرنیشنل ویمن سیریز کے 3 میچزنیشنل سٹیڈیم کراچی میں کھیلے جائیں گے۔ مقابلے بالترتیب آٹھ، گیارہ اور چودہ نومبر کوکھیلے جائیں گے۔مہمان ٹیم تین یوم مقامی ہوٹل میں آئسولیٹ رہے گی،جمعرات سے نیشنل سٹیڈیم میں پریکٹس کا آغاز کرے گی۔اگلے دو یوم 5اور 6 نومبر کوکراچی جمخانہ میں پریکٹس کرے گی۔ 7 نومبر کو نیشنل سٹیڈیم میں پریکٹس ہوگی۔سیریز کے بعد دونوں ٹیموں کو 16 نومبر کو زمبابوے روانہ ہونا ہے،21 نومبرتا 5 دسمبر آئی سی سی ویمنز کرکٹ ورلڈ کپ کوالیفائر میں شرکت کریں گی۔