لاہور(سپورٹس رپورٹر)پاکستان اور آسٹریلیا کے مابین وائٹ بال سیریز کا پہلا ون ڈے انٹرنیشنل میچ کل میلبرن کرکٹ گرائونڈ میں کھیلاجائے گا ۔ میچ کیلئے پاکستان کی پلیئنگ الیون کے حوالے سے ٹیم مینجمنٹ نے سر جوڑ لیے۔ قومی کرکٹ ٹیم کے کپتان محمد رضوان، ہیڈ کوچ جیسن گلیسپی اور سلیکٹر اسد شفیق نے پہلے میچ کی پلیئنگ الیون کیلئے مشاورت کی۔ پیس بیٹری کی قوت کیلئے پہلے ون ڈے میں حارث رئوف اور شاہین شاہ آفریدی کے ساتھ محمد حسنین کو میدان مین اتارے جانے کا امکان ہے۔ فخر زمان کی عدم موجودگی میں عبد اللہ شفیق کے ساتھ صائم ایوب اننگز کا آغاز کریں گے۔ بابر اعظم بدستور نمبر 3پر بیٹنگ کریں گے۔ مڈل آرڈر کی مضبوطی کیلئے کپتان محمد رضوان کے ساتھ نائب کپتان سلمان علی آغا بھی اننگز کو سہارا دیں گے۔