جنوبی وزیرستان‘ آپریشن میں 4 خوارج مارے گئے: آئی ایس پی آر

راولپنڈی+اسلام آباد (اپنے سٹاف رپورٹر سے+نمائندہ خصوصی +خبر نگار خصوصی) سکیورٹی فورسز نے جنوبی وزیرستان کے علاقے سروکئی میں کارروائی کے دوران چار خوارجی دہشت گردوں کو ہلاک کردیا۔ پاک فوج کے شعبہ تعلقات عامہ (آئی ایس پی آر) کے مطابق جنوبی وزیرستان میں سکیورٹی فورسز نے خوارجی دہشت گردوں کی موجودگی کی اطلاع پر آپریشن کیا۔ آئی ایس پی آر کے مطابق فائرنگ کے شدید تبادلے میں چار خوارجی دہشت گرد جہنم واصل ہوئے۔ ترجمان پاک فوج کے بعد خوارجیوں کی علاقہ سے مکمل صفائی کیلئے سکیورٹی فورسز کا آپریشن جاری ہے اور پاک فوج وطن عزیز کو دہشت گردی سے مکمل پاک کرنے کا عزم رکھتی ہے۔ دوسری جانب  وزیراعظم شہباز شریف‘ قائم مقام صدر یوسف رضا گیلانی  اور وفاقی وزیرداخلہ محسن نقوی نے جنوبی وزیرستان کے علاقے سروکئی میں خوارجی دہشتگردوں کے خلاف کامیاب آپریشنز پر سکیورٹی فورسز کو خراج تحسین پیش کرتے ہوئے خوارجی دہشت گردوں کو ہلاک کرنے پر انہیں شاباش دی۔ وزیراعظم نے کہا کہ سکیورٹی فورسز نے کامیاب کارروائی کرکے خوارجی دہشتگردوں کے ناپاک عزائم کو ناکام بنایا۔ خوارجی دہشتگردوں کے خلاف آپریشنز میں سکیورٹی فورسز کی  کامیابیاں لائق تحسین ہیں۔