کولمبو (نیوز ایجنسیاں) تیسرے آئی سی سی خواتین ورلڈ ٹی ٹوئنٹی کے پلے آف میچز آج کھیلے جائیں گے‘ پاکستان‘ جنوبی افریقہ‘ بھارت اور سری لنکا کے درمیان میچز کھیلے جائیں گے۔ سری لنکا میں جاری میگا ایونٹ میں منگل کو آرام کا دن تھا۔ آج پلے آف میچز کھیلے جائیں گے۔ پاکستانی ٹیم جنوبی افریقہ کے مدمقابل ہوگی ۔ میچ پاکستانی وقت کے مطابق صبح نو بجے شروع ہو گا جوکولمبو میں کھیلا جائے گا۔ پلے آف کا دوسرا میچ میزبان سری لنکا اور بھارت کے درمیان نو کھیلا جائے گا۔ یہ میچ بھی صبح نو بجے شروع ہو گا۔پہلا سیمی فائنل انگلینڈ اور نیوزی لینڈ کے درمیان کل کولمبو میں پاکستانی وقت کے مطابق دن دو بجے شروع ہو گا۔ دوسرا سیمی فائنل پانچ اکتوبر کو کولمبو میں پاکستانی وقت کے مطابق دن دو بجے شروع ہو گا۔ فائنل سات اکتوبر کو کولمبو میں کھیلا جائے گا۔