لاہور(کلچرل رپورٹر)فلمی دنیا کے معتبر ترین ایوارڈ آسکر اور ایمی ایوارڈ یافتہ فلم ساز شرمین عبید چنائے کے حوالے سے خبریں ہیں کہ وہ جلد ہی اپنی پہلی سائنس فکشن ہالی وڈ فلم کی ہدایات دیتی دکھائی دیں گی۔ شرمین عبید چنائے نے پہلی میگا بجٹ ہالی وڈ امریکی سائنس فکشن ویب سیریز مس مارول کی ہدایات بھی دی تھیں۔ شرمین عبید چنائے آسکر ایوارڈ یافتہ اداکار ول اسمتھ سمیت دیگر افراد کی جانب سے پروڈیوس کی جانے والی سائنس فکشن فلم بریلینس کی ہدایات دیں گی۔ بریلینس کی کہانی مارکس سیکی کے اسی نام کے ناول سے ماخوذ ہے، جس کی فلمی کہانی اکیوا گولڈس مین لکھیں گے جو کہ فلم کے شریک پروڈیوسر بھی ہوں گے۔ مذکورہ فلم کو ول سمتھ سمیت متعدد افراد پروڈیوس کریں گے اور اسے پیراماونٹ پکچر کے بینر تلے ریلیز کیا جائے گا۔ شرمین عبید چنائے اس وقت مذکورہ فلم کو پروڈیوس کرنے والی مختلف کمپنیوں سے بات چیت میں مصروف ہیں۔
اور ممکنہ طور پر آئندہ چند ہفتوں میں معاملات طے پا جائیں گے۔