لاہور چیمبر الیکشن: چیمبرکلاس کی تمام نشستوں پرپیاف فاؤنڈرز اتحاد بلامقابلہ کامیاب

لاہور (کامرس رپورٹر) لاہور چیمبر آف کامرس اینڈ انڈسٹری کے آئندہ انتخابات کیلئے چیمبر کلاس کی تمام آٹھ نشستوں پر پیاف فاونڈرز اتحاد کے 8 امیدوار بلامقابلہ منتخب ہوگئے ہیں۔ جن میںنصر اللہ مغل ، چوہدری محمد نصرت طاہر، شفیق احمد بٹ، فیاض حیدر، عامر انور، شیخ محمد ابراہیم، ڈاکٹر ریاض احمد اور علی حسام اصغر شامل ہیں۔ گزشتہ روز لاہور چیمبر آف کا مرس کے آئندہ انتخابات کیلئے کاغذات نامزدگی جمع کرانے کی آخری تاریخ تھی اور پیاف فاونڈرز اتحاد کے امیدواروں کے مقابلے میں کسی نے کاغذات نامزدگی جمع نہیں کرائے ہیں۔ انتخابی مہم کے کنوینر اور بزرگ تاجر رہنما افتخار علی ملک نے تمام نو منتخب عہدیداروں کو مبارکباد پیش کرتے ہوئے امید ظاہر کی ہے کہ ووٹرز ایسوسی ایٹ کلاس کے انتخابات میں بھی پیاف فاونڈرز اتحاد کے امیدواروں پر اسی اعتماد کا اظہار کریں گے۔