شکارپور،جتوئی برادری میں گولیاں چل گئیں ،دونوں فریقین مورچہ بند

شکارپور (نامہ نگار) تھانہ رستم کی حدود چمن سکھپور کے قریب گاؤں محمد اسمائیل دودانی جتوئی میں جتوئی برادری کے دو فریقین کے درمیان جاری تنازعہ پھر بھڑک اٹھا. تصادم کے نتیجے میں فائرنگ کے دوران گولیاں لگنے کے باعث بزرگ شخص رحمت اللہ دودانی جتوئی موقع پر ہی جاں بحق ہوگیا،واقعے کے بعد دونوں فریقین مورچہ بند ہوکر ایک دوسرے پر گولیاں برساتے رہے. شدید فائرنگ سے علاقہ جنگ کے میدان میں تبدیل ہوگیامسلسل کئی گھنٹوں تک جاری رہنے والی فائرنگ سے علاقہ مکینوں میں خوف و ہراس چھایا رہا. علاقے کی معزز شخصیات کی مداخلت کرنے پر فائرنگ بند ہونے کے بعد پولیس نے جائے وقوعہ پر پہنچ کر مقتول کی لاش کو اپنی تحویل میں لیکر اسپتال پہنچایا. جہاں سے پوسٹ مارٹم کرانے کے بعد لاش کو ورثاء  کے حوالے کیا گیا. واقعے کے متعلق ایس ایچ او تھانہ رستم نے بتایا کہ فریقین آپس میں چچا زاد بھائی ہیں، جن میں سیاہ کاری کی بات پر یہ واقعہ پیش آیا ہے. متاثرہ فریق ہمارے پاس مقدمہ درج کرانے کے لئے آئے تو پولیس کاروائی کرکے واقعے میں ملوث ملزمان کے خلاف کاروائی کرے گی. آخری اطلاعات تک واقعے کا مقدمہ درج نہیں ہوا۔