راولپنڈی میٹرو میں آتشزدگی‘ مسافروں کی چلتی بس سے چھلانگیں‘ 2 زخمی

راولپنڈی (نوائے وقت رپورٹ) رحمان آباد میٹرو اسٹیشن کے قریب میٹرو بس میں آتشزدگی کے سبب مسافروں نے شیشے توڑ کر چھلانگیں لگا دیں۔ ایک خاتون سمیت 2 افراد شدید زخمی ہوگئی۔ راولپنڈی سے اسلام آباد جانے والی میٹرو بس کے انجن میں آگ لگی جس سے بس میں دھواں بھر گیا، بس میں موجود مسافروں میں بھگڈر مچ گئی۔ ترجمان ریسکیو 1122 کے مطابق امدادی ٹیموں نے موقع پر پہنچی کر دونوں زخمیوں کو بے نظیر بھٹو ہسپتال منتقل کر دیا۔ آگ لگنے کے بعد میٹرو بس سروس ایک گھنٹے تک معطل رہی جس سے شہریوں کو پریشانی کا سامنا کرنا پڑا۔ میٹرو بس حکام کا کہنا تھا کہ انجن میں خرابی کے باعث بس میں دھواں بھرنے سے بھگدڑ مچی جس سے مسافر پریشان ہوئے، میٹرو بس کو جزوی نقصان پہنچا ہے جس کو فوری طور پر مرمت کے لیے میٹروبس ڈپو منتقل کرکے بس آپریشن کو بحال کر دیا ہے۔