اسلام آباد (نمائندہ خصوصی)چیئر مین پاکستان پیپلز پارٹی بلاول بھٹو زرداری نے زرداری ہائوس میں ایک مصروف دن گزارا ‘جس میں انہوں نے پارٹی رہنماوں سے علیحدہ علیحدہ ملاقاتیں کیں۔ پاکستان پیپلزپارٹی کے چیئرمین بلاول بھٹو زرداری سے بلوچستان کے وزیراعلی سرفراز بگٹی نے ملاقات کی اور انہیں صوبائی حکومت کی کارکردگی پر بریفنگ دی اور بلوچستان کی سیاسی صورتحال پر تبادلہ خیال کیا۔ وزیراعلی سرفراز بگٹی نے بلوچستان میں دہشت گردی کی حالیہ لہر اور اس پر قابو پانے کے اقدامات سے متعلق بریفنگ دی۔ بلوچستان میں بارشوں کے بعد کی سیلابی صورت حال اور اس پر قابو پانے کے اقدامات سے بھی آگاہ کیا۔ بلاول بھٹو زرداری سے پاکستان پیپلز پارٹی کے سیکریٹری جنرل نیر بخاری اور پاکستان پیپلز پارٹی کی انسانی حقوق کمیٹی کے صدر فرحت اللہ بابر نے ملاقات کی، اس موقع پر ان کے درمیان سیاسی و تنظیمی صورت حال پر بات چیت ہوئی۔ چیئرمین بلاول بھٹو زرداری کی پاکستان پیپلز پارٹی وسطی پنجاب کے صدر راجہ پرویز اشرف سے بھی ملاقات ہوئی اور اس ملاقات کے دوران پنجاب کی سیاسی و تنظیمی صورت حال پر گفتگو کی۔