ایشین ہاکی چیمپئنز ٹرافی سے قبل پاکستان ہاکی ٹیم کو دھچکا، غیر ملکی کوچ سے محروم

لاہور(سپورٹس رپورٹر) ایشین ہاکی چیمپئنز ٹرافی سے قبل پاکستان ہاکی ٹیم کو بڑا دھچکا لگا ہے اور قومی ٹیم سینئر کھلاڑیوں کے بعد غیر ملکی کوچ رولینٹ آلٹمنز کی خدمات سے بھی محروم ہوگئی۔ ایشین ہاکی چیمپئنز ٹرافی 8 ستمبر سے شروع ہوگی اور پاکستان اپنا پہلا میچ ملائیشیا کیخلاف کھیلے گا۔ لیکن اب بتایا جارہا ہے کہ چین میں موجود پاکستان ہاکی ٹیم مشکلات کا شکار ہے کیونکہ غیر ملکی ڈچ کوچ رولینٹ آلٹمنز نے بھی پاکستان ہاکی ٹیم کی کوچنگ سے انکار کردیا ہے۔ رولینٹ پاکستانی ٹیم کیساتھ طویل معاہدہ کرنے کے خواہشمند ہیں جبکہ پاکستا ن ہاکی فیڈریشن ان سے ایونٹ ٹو ایونٹ کنٹریکٹ کرنا چاہتی تھی۔ ذرائع کے مطابق پی ایچ ایف کی رولینٹ آلٹمنز سے بات نہیں بن سکی۔ لہٰذا وہ ایشین ہاکی چیمپئنز ٹرافی میں پاکستان ٹیم کو دستیاب نہیں ہوں گے۔ دوسری جانب پاکستان ہاکی ٹیم کے نائب کپتان ابوبکر کا بھی تاحال چین کا ویزا نہیں لگا ہے اور وہ آسٹریلیا میں لیگ ہاکی کھیل رہے ہیں۔ انہیں آسٹریلیا سے ہی پاکستان ہاکی ٹیم کو چین میں جوائن کرنا تھا۔ ادھر مرتضیٰ یعقوب، احتشام اسلام اور عبدالرحمٰن یورپ میں لیگ کھیل رہے ہیں جبکہ ارباز احمد نے بھی مصروفیت کی وجہ سے چین جانے سے انکار کردیا تھا۔ اذلان شاہ اور نیشنز کپ کھیلنے والی پاکستان ہاکی ٹیم کے 6 سینئر کھلاڑی ٹیم کو دستیاب نہیں ہیں۔