اسلام آباد(خبر نگار)رینجرز ٹریننگ سینٹر اور اسکول کراچی میں بیسک ریکروٹس ٹریننگ کورس 28 کے پاسنگ آؤٹ پریڈ کا انعقاد کیا گیا۔ اس موقع پر کور کمانڈر کراچی ، لیفٹیننٹ جنرل ندیم احمد انجم مہمان خصوصی تھے۔  ڈی جی رینجرز سندھ  سمیت محدود عہدیداروں نے شرکت کی۔ کور کمانڈر  کراچی ، لیفٹیننٹ جنرل ندیم احمد انجم  نے پریڈ کا جائزہ لیا اور ممتاز ٹرینیوں کو انعامات دیئے۔ کور کمانڈر کراچی ، لیفٹیننٹ جنرل ندیم احمد انجم نے  سندھ میں امن وامان برقرار رکھنے  اور   سرحدوں کو محفوظ  بنانے کے لئے سندھ رینجرز کے تربیتی معیار ، چستی اور لگن کی تعریف کی۔ کور کمانڈر نے کامیاب ٹرینیوں کو مبارکباد پیش کی اور اس عزم کا اظہار کیا کہ وہ موجودہ افرادی قوت میں ایک بہترین اضافہ ثابت ہوں گے۔