فرانس کے برنارڈ آرنلٹ دنیا کے امیر ترین شخص، فوربز کی فہرست جاری

لاہور (نوائے وقت رپورٹ) امریکی جریدے فوربز نے 2024ء کے لیے دنیا کے امیر ترین افراد کی فہرست جاری کر دی ہے۔ دنیا بھر میں ارب پتی افراد کی تعداد تاریخ کی بلند ترین سطح پر پہنچ گئی ہے اور گزشتہ ایک سال کے دوران ان کی دولت میں نمایاں اضافہ ہوا ہے۔ ایک سال کے دوران 141 مزید افراد ارب پتی بنے اور مجموعی طور پر 2781 افراد اس فہرست میں شامل ہیں۔ فہرست کے مطابق دنیا میں سب سے زیادہ ارب پتی امریکا میں رہائش پذیر ہیں جن کی تعداد 813 ہے۔ فرانس کے برنارڈ آرنلٹ 2024 کی فہرست میں دنیا کے امیر ترین فرد قرار پائے ہیں جن کے اثاثوں کی مالیت 233 ارب ڈالرز ہے۔ یہ اعزاز انہیں مسلسل دوسرے سال حاصل ہوا ہے۔ ایک سال میں ان کے اثاثوں میں 22 ارب ڈالرز کا اضافہ ہوا۔ ٹیسلا اور سپیس ایکس کے مالک ایلون مسک اس فہرست میں 195 ارب ڈالرز کے ساتھ دوسرے نمبر پر موجود ہیں۔ ایمازون کے بانی جیف بیزوز کے حصے میں تیسرا نمبر آیا جو 195 ارب ڈالرز کے مالک ہیں جبکہ میٹا کے چیف ایگزیکٹو مارک زکربرگ 177 ارب ڈالرز کے ساتھ چوتھے نمبر پر رہے۔ بھارت کے مکیش امبانی 116 ارب ڈالرز کے ساتھ دنیا کے 9 ویں جبکہ ایشیا کے امیر ترین شخص قرار پائے۔